Davao City- Dili epektibo ang pagbutang og early warning devices ug pag apud-apud og hinabang kada higayun nga adunay kalamidad nga mahitabo sa syudad sama sa bagyo.
Segun kang Chinkie Golle, executive director sa Interface Development Interventions (IDIS) atol sa Kapehan kagahapong adlawa, bisan pa man usa ka maayong istratehiya sa disaster risk management ang pagmontar og early warning ug pre-emptive evacuation, gikinahanglan na gayud nga buhaton ang wala pa nabuhat dinhi sa syudad sa Davao nga mao ang pagbutang og relokasyon sa komunidad sa mga ‘disaster-prone areas.’
Dugang ni Golle, hagit karon sa kabarangayan ang pagpangita og lugar alang sa katukoran sa on-site relocation sites diin usa kini sa pamaagi aron makab-ot ang long-term nga mga solusyon pinaagi sa pagtagana og luwas nga lugar alang sa mga residenteng nagpuyo sa ‘landslide or flood-prone areas.’
Matud ni Golle, karon na usab ang panahon nga mulihok ang opisyales sa mga barangay ug mutabang sa City Planning and Development Office sa pagpangita og mga area sulod sa ilang tagsatagsa ka mga lokalidad alang sa pagtukod og relocation area alang sa mga residente diin sila man usab mismo nahibalo sa ihap sa apektadong pamilya ug sa total land area sa ilang komunidad.
RadyoMaN Renz Barbarona
