Report nga mikanaog ang mga rebelde sa bukirang bahin sa Tagpangi, usa ka fake news; mga netizens nadismaya sa maong report

132

Dismayado ug gibatig kasuko ang mga netizens sa social media, human nasayrang usa ka fake news ang migawas nga report nga mikanaog ang mga armadong tawo nga gituhoang rebelde sa bukirang bahin sa Tagpangi ning dakbayan.

 

Gani adunay pipila ka opisyal ang mibatig kadismaya, gumikan sa maong iresponsableng report nga nakahatag panic ug kahasol sa katawhan sa Tagpangi ug Pagalungan ning syudad, kinsa mibakwit sa covered court sa barangay Lumbia.

 

Tungod niini, gitawagan sa dxCC-RMN Cagayan de Oro si Col. Edgardo de Leon, ang Commander sa 403rd Infantry Brigade aron masuta kung unsa ka tinuod ang maong report.

 

Tuod man gibutyag sa maong opisyal nga dili kini tinuod ug usa lamang ka fake news, aron paghatag kahadlok sa katawhan ug posibling hinimoan lamang kini sa mga criminal nga diha mipaingon sa maong dapit.

 

Gumikan niini, gipa-imbistigahan na ni Col. De Leon kung kinsa ang nagpakatag sa maong fake news aron kini mapasakaan og kaso.

Facebook Comments