TACLOBAN CITY – Nadakop na an suspek nga nagkawat hin motor han usa nga reporter han RMN, arestado an suspek ha Baybay Boulevard, Borongan City, Eastern Samar kasangkulop, October 8.
Ginkilala an suspek nga hi Reme Capito, 21 anyos, residente han Brgy. Taboc han nasabi nga syudad.
Ginkawat ni Capito an motor ni RMN reporter Noel Sianosa, 37 anyos, residente han Brgy. 91, Abucay, Tacloban City.
Dida han August 26, ginpark ni Sianosa an iya motor harani harani ha usa nga mall ha Abucay han kawaton ini han suspek.
Sanglit ginpahibaro dayon ni Sianosa an Tacloban PNP pinaagi kan P/Capt. Daniel Polo, station 2 commander.
Nagpasamwak dayon hin impormasyon hi P/Capt. Polo ha tanan nga police stations han nawawara nga motor.
Ha checkpoint operations han mga kapulisan ha Borongan, nakit-an an suspek sakay han motor ngan may dara pa ini nga .38 caliber nga pusil ngan magtarom nga butang.
Maatubang an suspek hin kaso nga carnapping ngan illegal possession of firearms.
