Davao City – Gisugdan na kagahapong adlawa ang pagpapahawa sa mga nagpuyo sa mga ‘danger zones’ sa syudad sa Davao.
Mokabat sa 143 ka mga pamilya ang gipapahawa sa Barangay 40-D Bolton Extension nga duol sa sapa subay sa gitinguha sa kagamhanan sa syudad tungod ug alang sa kaluwasan sa mga tawo sa higayong dunay matigayong kalamidad sa syudad sama sa baha, linog ug uban pa.
Sumala ni Barangay 5-A Barangay Captain Romeo Pantonial, ensakto ug tama lamang ang gihimo sa syudad pinaagi kang Mayor Inday Sara Duterte-Carpio tungod sa kaluwasan sa mga tawo nga nagpuyo daplin sa sapa sa higayong dunay matigayong pagbaha, hinoon matud ni Kapitan Pantonial sa iyang barangay wala pa sila gipahibalo kabahin niini.
Hangyo lang pud sa mga mademolish giingon ni Pantonial ilabina sa iyang barangay nga daghan usab ang nagpuyo duol sa Davao River nga hatagan og relokasyon tungod kay andam sila motuman niini.
Hinoon gipasabot lang daan ni Pantonial sa iyang mga katagi-barangay kabahin sa plano sa syudad aron masalbar ang mga anaa nagpuyo sa mga ‘critical areas.’
RadyoMaN Bernard Pantallon
