Nakadawat na ug tag tulo(3) ka baktin ang mga membro sa lima (5) ka mga kooperatiba sa lungsod sa Siayan nga resipiyente sa Department of Agriculture (DA)-Philippine Rural Development Project (PRDP)/Investments- Rural Enterprise and Agricultural Productivity (I-REAP) ubos project enterprise nga Swine Production and Marketing Enterprise.
Ang lima ka kooperatiba nga naka-avail sa kapin P6 milyones nga project enterprise gikan sa PRDP/I-REAP mao ang Dumpilas Consumers’ Cooperative (DUCONCO), Gunayen Consumers’ Cooperative (GUCONCO), Paranglumba Consumers’ Cooperative (PACONCO), Sayaw Consumers’ Cooperative (SACONCO) ug Siayan Pangkabuhayan Federation Cooperative (SIAPAFEDCO) maoy Lead Proponent Group.
Atol sa gipahigayon nga joint inspection tali sa RPCO (Regional Project Coornating Office) ug sa PPMIU (Provincial Project Management and Implementing Unit) sa kagamhanang probinsiyal sa Zamboanga del Norte, katorse (14) ka mga membro sa matag kooperatiba ang nakadawat na ug baktin isip starter stocks alang sa ilang livelihood program.
Sa nasangpit nga livelihood program, ang SIAPAFEDCO isip lead proponent group maoy magsilbing consolidator samtang ang upat ka cluster members maoy magbuhi ug tag lima ka anay ug usa ka butakal dinha sa communal pigpen ug kini maoy pasanayon aron ang mga baktin niini maoy ipang-apod-apod sa mga membrong wala pa nahatagi ug mga baktin.
Ang Swine Production and Marketing Enterprise sa lungsod sa Siayan nagpunting sa pagsubad sa production gap sa local swine industry pinaagi sa pagtukod ug sustainable income generating projects alang sa mga kooperatiba kansang mga membro mao ang mag-uuma.
Gipangindahay nga kon mouswag ug 15% ang kita sa mag-uuma sa umaabot, kini makonsidera na nga successful. (PIC-elds)
