Resita sa mga biktima sa food poisoning gi-ako sa ginang nga naghatag sa spaghetti

Davao City – Nagkaproblema karon si Rolando Misa, kung asa magkuha og kwarta alang sa gastohanan sa pagkaon, pamasahe ug tambal sa iyang asawa nga si Maricel ug anak kinsa anaa karon sa Southern Philippines Medical Center, human na food poison sa gikaon nga spaghetti nga hinatag ni Geraldine Bocuya.

Sa interview sa DXDC RMN Davao kang Rolando, giingon niini nga P500 lang ang dala nga kwarta sa iyang paryente nga nag-asikaso sa iyang pamilya sa SPMC ug kung mahurot na kini wa siyay kakuhaan og kwarta.

Alayon niini gitabangan sa DXDC RMN Davao News Team si Rolando, aron hangyuon si Geraldine nga matabangan sila sa gastohan sama sa tambal, sanglit ang rason sa pagkalanag sa pamilya mao man ang hinatag niyang spaghetti.

Gibutyag ni Geraldine, wala niya pasagdi ang mga residente sa Sitio Matigsalog, Barangay Marilog nga nalanag ug iyang gi-abaga ang pampalit sa tambal alang sa pamilya ni Rolando.

Gipasabot ni Geraldine, walay dautang tumong ang iyang paghatag sa maong pagkaon sa iyang mga silingan. Andam mo-atubang si Geraldine sa himoong inbestigasyon aron malimpyohan ang iyang pangalan tungod sa nahitabo.

Samtang gibutyag ni Marilog District Health Center Head Doctor Jethro Biolanco, dili pa masulti kung unsa gayod ang rason sa pagkalanag sa 11 ka residente, diin kasagaran kanila mga bata. Gipaabot nalang nga mogawas ang resulta sa laboratoryo sa gikuhang sample sa spaghetti ug tubig nga giinom sa mga biktima.

RadyoMaN Joel Viray