Sa caption sa video nga gipost sa maong beach resort niadtong Enero 15, 2024, ilahang nakaplagan ang mga baby pawikans ug ilaha kining atimanon ug buhian human sa unom ka bulan.
Matud sa DENR 11 nga importanteng ma-release dayon sa dagat ang mga hatchlings sa higayon nga kini mapusa sa ilahang mga nest.
Giadtuan sa DENR ang resort niadtong Enero 16,2024 aron maberipika ang nasangpit nga post ug nakumpirmang anaa sa 130 ka mga Hawksbill turtle hatchlings ang gipangbutang sa mga styroboxes.
Sa Department Administrative Order (DAO) 2019-09 ang Hawksbill ug Leatherback gikonsiderang Critically Endangered o taas na ang risgo sa extinction.
Matud sa DENR kalapasan kini ilawom sa Republic Act (RA) 9147 o Wildlife Resources Conservation and Protection Act diin bawal ang bisan kinsang mga tawo nga tipigan ang wildlife resources ug ang ilahang pinuy-anan, pagkolekta, pagpangita o pagpanag-iya og mga mananap o mga by-products niini.
Pweding silotan o multahan ang resort og gikan sa P30,000 ngadto sa P300,000 lakip na pagkapriso sulod sa duha ngadto sa upat ka tuig.
Ilawom sa giisyong NOV gimanduan ang tag-iya nga buhian ang mga hatchlings sulod sa 24 oras kundili muhimo na og legal action ang DENR 11 batok sa maong resort.
RadyoMaN Aimee Guinita
