Davao City – Gipusil sa usa ka kanhi police superintendent ang kaugalingon human niini pusila ang iyang asawa lakip ang pag-umangkon sa biktima.
Kini mao ang gikumpirma ni PCI Paulino Sahulga, station commander sa Tugbok PNP.
Sa ekslusibong pakighinabi sa DXDC News Team kaniya, gisaysay niini nga nakadawat matud pa sila og impormasyon nahitabo sulod sa Aguiling Compound, Sitio Basak Mintal ning syudad sa Davao, alas 2 sa hapon niadtong adlawng Sabado bahin sa maong insidente gani dali nila kining girespondehan.
Dugang niini, duha ka lawas ang ilang nakita diin kini mao si kanhi Ret. PSupt Aguiling ug ang pag-umangkon sa biktima nga si Miss Oliva kinsa daling gisapupo sa balay-tambalanan.
Migula sa ilang imbestigasyon nga nag-ayaw sa wala masayring hinungdan ang mag-asawa diin miresulta kini sa pagpamusil sa kanhi opisyal ngadto sa iyang asawa.
Mipatunga matud pa ang pag-umangkon sa asawa gani kini siya ang una naigo tumong sa ulo ug sa dughan nga bahin.
Sunod gipunterya sa suspek ang iyang asawa diin naigo kini una sa ilong nga bahin sunod sa wala nga abaga hinungdan nga nakadagan kini ug nakasakay og tricycle samtang gipusil sa suspek ang kaugalingon tumong sa ulo nga bahin.
Narekober sa crime scene ang .22 kalibre sa pistola nga maoy gigamit sa suspetsado lakip ang lima ka mga empty shells sa bala ug usa nga wala nagamit.
Gihatagan og first aid si Mrs. Aguiling sulod sa Holy spirit Hospital dayon gidala sa Davao Doctors Hospital.
Samtang deklaradong patay si Supt. Aguiling ug alas 4:00 sa kadlawon gideklarang patay si Miss Oliva sulod sa SPMC.
Sa pagkakaron, padayon pa ang pagpalawom sa imbestigasyon sa kapulisan bahin sa motibo sa pagpamusil sa kanhi PNP Supt.
RadyoMaN Jason Amisola
