General Santos City–Anaa pa karon sa talandugon nga kahimtang sulod sa balay tambalanan ang usa ka retiradong pulis nga si Nico Lagahit, 62 anyos, nga nanimuyo sa Purok San Roque, Labangal, Gensan kansa una nang nakit-an sa iyang anak nga nagbuy-od nga dunay igo sa papangig nga milapos sa baba niini sulod sa ilang panimalay niadtong adalwāng Biyernes.
Pagbutyag ni Police Major Ananias Vasquez ang labaw sa Makar PNP dihang ilang giaadtuan ang panimalay sa nasampit ilang nakita nga dunay likido sa kusina nga bahin sa panimlay niini.
Dugang asoy sa opisyal nga basi sa ilang imbestigasyon nasuta nga nagpusil sa kaugalingon si Lagahit tungod lamang sa gihambin niining sakit sa iyang kidney kini basi usab sa pamahayag sa iyang mga anak.
Samtang pagbutyag usab ni Police Major Ananias Vasquez nga posibleng na-depress ang nasampit nga retiradong pulis gumikan sa sakit niini ilabi na nga ginapailawom kini sa dialysis ug wala na nakaagwanta pa hinungdan nga nakahuna-huna sa pagsuway ug kutlo sa iyang kinabuhi.
Wala matud pay gibilin nga suicide note si Lagahit ngadto na sa iyang pamilya bag-o niini gihimo ang pagpusil sa iyang kaugalingon gamit niini ang iyang kalibre .45 nga pistol.
Pagpaklaro sa opisyal nga wala silay nakitang foul play sa nahitabo kang Lagahit nga kasamtangang padayon nga giatiman sa mga mananambal sulod sa Intensive Care Unit. (Reynald Timario)
