Retrieval ops magpadayon kutob sa makuha ang mga missing persons sa Masara landslide

Davao City-Walay ultimatum nga hunungon ang search and retrieval operation sa ground zero ug gipanganti sa Davao de Oro Provincial Government nga makuha ang tanang mga missing nga biktima sa landslide sa Barangay Masara, Maco, Davao de Oro.

Sa interbyu sa DXDC RMN Davao kang Jiesyl Mae Tan, Maco Incident Command Post-Incident Management Team (ICP-IMT) information officer, sa nagpadayong retrieval operation nasayran nga pinakadaghang patay nga nakuha sa sector 1 ug 2 sa ground zero.

Matud ni Tan wala nila gipadaplin nga milagrong aduna pa gihapoy survivor.

Sa 7:00 PM February 16, 2024 repert sa Municipality of Maco,96 ka mga patayng lawas na ang narekober lakip niini mga parte sa lawas ug 18 kabuok ang mga missing individuals.

Sa rekomendasyon sa mga eksperto diin ang mga unidentified nga patayng lawas anaa sa state of decomposition, temporaryong gipahiluna ang walo ka mga unidentified bodies ug 6 ka unidentified body parts sa Maco Public Cemetery, Brgy Hijo, Maco, Davao de Oro niadtong Pebrero 14,2024.

Sumala ni Tan, niagi kini’g post-mortem examination arun matuki ang hinungdan sa pagkamatay, pagsusi sa identipikasyon sa maong cadavers ug pag-kolekta sa DNA.

RadyoMaN Aimee Guinita