Davao City- Nagmalampuson ug nahimong malinawon ang gihimong lain pang panagtigum sa Freedom Park sa may dalang Roxas ning syudad sa Davao kagahapong adlawa, Nobyembre 30.
Kini ang sigun ni Hugpong Federal Regional Director Conrado Manigque Jr. atol sa interview sa DXDC RMN Davao kaniya diin sumala niya, kapin usa ka libo ka mga partisipante ang niduyog sa rally nga gitambungan sa Hugpong Federal Movement of the Philippines ug Revolutionary Government Movement aron sa pagpadayag sa publiko kalabutan sa revolutionary government isip pagsuporta kang Presidente Rodrigo Duterte.
Dugang ni Manigque, pinaagi sa sa maong programa, napasabot sa katawhan nga kinahanglang suportahan ang pamuno-nasud aron hingpit na nga makab-ot ang kabag-uhan sa nasud ubos sa liderato ni Presidente Duterte.
Mapasalamaton usab si Manigque sa tanang katawhan ilabi na sa mga presensya sa Brgy. Officials nga misuporta gikan sa nagkalain-laing bahin sa Rehiyon XI.
Kahinumduman nga tulo ka mga rally ang gipahigayon kagahapong adlawa diin asa gihimo ang grand revolutionary rally sa Crocodile Park ug Freedom Park samtang nagpahigayon usab og laing rally ang mga anti Duterte groups nga gipangulohan sa Kilusang Mayo Uno sa may Roxas Avenue.
Subay sa abalwasyon sa kapulisan, nahimong hapsay ug walay kakulian ang natigayong mga rally kagahapong adlawa.
RadyoMaN Don Pulayao
