Gisugilon karon sa Malacañang nga dili gayud ipakanaug ni Pres. Rodrigo Duterte ang gibandilyong ‘revolutionary government’ kun walay igong hulga sa atong estabilidad ubos sa doktrinang ‘clear and present danger.’
Sa pakighinabi kaniya kaganina sa morning primetime radio social commentary nga ‘Straight to the Point,’ gi-angkon ni Presidential Spokesperson Harry Roque nga usa kini ka lakang nga makonsidera nga ‘extra-constitutional’ kun gawas sa coverage kun hurisdiksyon sa konstitusyon sa nasud, hinungdan sa kabalaka sa ubang sektor sa posibleng mga pagpang-abusar ubos sa rehimeng awtoritaryan kun dictatorial.
Karong November 30, usaka dakung rally ilusad denhe sa syudad sa Davao pangulohan sa mga pundok nga nagpaluyo sa krusadang kutlo-on ang suporta sa mayoriya sa katawhan aron kumbinsihon si Pres. Duterte nga mo-imposar sa usaka ‘revolutionary government.’
Ubos sa maong governmental setup, bungkag ang tanang ahensiya ug departamento sa gobyerno ug magsugod pagbalik ‘from scratch’ aron puohon in the process ang mga ma-anomalosong opisyales ug pulihan sa mga tawong sinaligan sa rehimen.
Tupad usab niana, gituhuang motuyhakaw usab ang lain pang krusadang nagsumikad denhe sa Mindanao nga mao ang kampanya alang sa Pederalismo agig tubag sa panawagan sa taga-habagatan alang sa kaugalingnan kun awtonomiya ubos sa akseptadong prinsipyong ‘right to self-determination’ sa mga hut-ong nga nangandoy ug maluntarong kagawasan.
RadyoMaN June Duterte
