Davao City – Walay pagsupak ang Lesbian, Gay, Bisexual & Transgender kun LGBT community sa first-time-ever ‘Reyna Davaoeña’ Beauty Pageant nga salmutan sa mga lalake nga mga huyang og pagbati isip kabahin sa aktibidad sa ika 82nd ‘Araw Ng Davao.’
Suportado sa kanhi Miss Gay Universe Organizer nga si Diding Lopez ang ‘Reyna Davaoeña’ diin kampante kini nga ang tibuok kumunidad sa LGBT andam mupaluyo sa tigi sa ilang hut-ong.
Walay nakitang dautan si Lopez sa pagbaton og susama nga aktibidad sanglit igo lang kini naghatag og kahigayonan sa ilang hut-ong nga mapakita ang ilang talento uban sa paglaum nga madawat na sila sa katawhan isip kabahin sa komunidad.
Aminado si Lopez nga sa pagkakaron, dili pa andam ang kinabag-ang du-ot sa katawhan sa pagdawat sa mga gay pageants apan mapasalamaton gihapon kini kay dinhi sa siyudad, wala nay diskriminasyon ngadto kanila dili sama sa ubang lugar.
Segun ni Lopez, ang ‘Reyna Davaoeña’ maoy magpasabot sa mga tawo nga sirado pa sa reyalidad ug sa kamatuoran nga dili lamang babaye ug lalake ang gibuhat sa Dios apan lakip na usab ang mga ‘third sex.’
Sumala ni Lopez, ang ‘Reyna Davaoeña’ mas magpakusog pa kini sa turismo sa dakbayan tungod sa mga bisita sa ubang lugar nga mudagsa sa siyudad aron mutan-aw sa indigay.
Nianang panahona, masaksihan na sa mga Dabawenyo kung unsa na kadaghan ang mga mahuyang ug mga lakin-on apan nagkahiusa sa pag-asdang sa kaayohan ug kaangayan sa ilang katungod sa presenteng panahon.
Gipasalamatan usab ni Lopez si Mayor Inday Sara Duterte-Carpio tungod sa paghatag niini og suporta ug bili sa LGBT community dinhi sa dakbayan nga wala mahitabo sa ubang lugar sa nasud.
RadyoMaN Joel Viray
