Davao City – Nabalaka karon ang kanhi chairman sa Committee on Agriculture sa konseho sa syudad sa Davao kabahin niining suliran karon sa NFA rice nga basin ug mobalik kaniadto nga dunay tawo ang mamatay tungod kay nag-ilog sa pagpalit ug bugas sa NFA.
Sumala ni Davao City 3rd District Councilor Conrado “Conde” Baluran, kinahanglang usbon sa gobyerno ang sistema sa pag-angkat ug bugas tungod kay dunay natigayong binuang pinaagi sa pagsagul-sagol gikan sa commercial rice.
Giingon pa sa kanhi chairman sa Committee on Agriculture nga namatikdan na kini nga binuang kaniadto nga ang commercial rice sagulan ug NFA rice aron ibaligya sa mas mahal nga presyo.
Kabahin niini nga anomaliya gihagit ni Baluran ang gobyerno kung kaniadto wala kini mabadlong apan karon kinahanglang maundang na.
Matud ni Baluran, kinahanglang mobarug ang gobyerno pabor sa mga pobreng tawo sa pag-angkat sa bugas inay sa mga adunahang negosyante.
RadyoMaN Bernard Pantallon
