Rider gidasmagan og Montero, driver angol

Davao City- Nagpatabang sa Sasa Police Station ang usa ka rider aron mailhan ang driver sa Montero nga naghit-and-run kaniya nga natigayon sa may Lanang ning siyudad 5:45 sa hapon.

Nagkapangos ang kalawasan sa biktima nga giilang si Gerome Gemar, 33 anyos, ulitawo, ug ang sakay niini nga si Anna Maria Olea, 33 anyos, ug nagpuyo sa Doña Pilar, Sasa samtang midangop sila sa Presinto #4.

Saysay ni Gerome nga paliko na unta sila sa usa ka subdivision sa Lanang gikan north area dihang kalit lang sila gibanggaan sa naghaguros nga Montero.

Apan maayo nalang kay wala kaayo sila naantimano apan nagkapangos ang ilang mga kalawasan human nabaghid ang ilang mga lawas sa sementong dalan.

Suwayan sa Sasa Pnp-Traffic Section ang lugar kung asa nahitabo ang insidente ug kon duna ba’y CCTV nakamuntar sa dapit sarang magamit sa kapulisan aron mailhan ang plaka sa Montero lakip na ang Driver niini.

Sa karon, nakapatambal na sa Southern Philippines Medical Center ang mga biktima.

RadyoMaN Joel Viray