Sumala sa report sa Davao City Police Office (DCPO), giila ang namatay nga si alyas “Vincent”, 20 anyos, taga Maragusan, Davao de Oro. Ang iyang angkas nga si alyas “Greg”, 27 anyos, residente sa Purok 34, South Villa, Barangay Maa, Davao City, nasamdan ug giingong nagpadayon karon ang pagtambal sa Southern Philippine Medical Center (SPMC).
Sa imbestigasyon ni PSSg Arnel Cañetan, Traffic Investigator sa San Pedro Police Station, nasuta nga ang motorsiklo nagsubay sa Mabini Street, gikan Arellano Street paingon Araullo Street. Samtang ang Grab taxi nagsubay sa V. Mapa Street, gikan Tionko Avenue paingon Tavera Street. Pag-abot sa intersection, didto nahitabo ang bangga.
Tungod sa kakusog sa impact, si Vincent nakabsan dayon sa iyang kinabuhi human makadawat ug grabeng kadaut sa lawas. Ang iyang angkas nga si Greg nasamdan ug daling gidala sa SPMC.
Ang drayber sa Grab taxi giila nga si Collen Aure, 37 anyos, taga Matina Pangi. Siya karon anaa na sa kustodiya sa kapulisan sa San Pedro ug mag-atubang sa hustong kaso.
RadyoMan Don Pulayao
