Gitabang pa sa Central 911 Medic Team ang biktima nga giilang si Atilano Tabla, 52 anyos, minyo, ug residente sa PMPC Village, Panacan, Davao City apan wala na masalba pa ug gideklarang patay na gumikan sa bun-og nga nahiagoman niini sa lawas.
Migawas sa imbestigasyon sa Buhangin PNP-Traffic Section, miagi sa dalan paingon sa Catitipan ang biktima dihang na side sweep ang motor nga gimanehoan ni Tabla sa truck nga gidrayban sa usa ka Fercito Suarez, 41 anyos, nagpuyo sa Trento, Agusan Del Sur.
Sa dugang pagsusi, gikaon sa motor sa biktima ang walang bahin sa dalan samtang naa sa pinakasulod nga bahin sa dalan ang truck ug misuway og overtake ang biktima agi sa wala dihang nahitabo ang disgrasya nga natigayon sa CP Garcia Highway, Buhangin area ning siyudad.
Tungod sa kakusog sa impact, nahulog sa motor ug na-drag og 200 metros ang biktima rason sa bun-og ug pangos nga nagresulta sa kamatayon sa rider.
Gidala na sa Saint Peter Funeral Parlor ang patay’ng lawas sa biktima. Samtang sa pinakaulahing kasayoran nagka-areglo na ang kumpanya sa truck ug kabanay labot sa maong insidente.
