Rider nga nag viral human mihigda sa motosiklo nailhan na sa Panabo City Police Office

Gikumpirmar ni Police Major Jun Bautista, chief of police sa Panabo City Police Office nga nailhan na sa ang iyang mga traffic investigator ang rider nga mihigda sa motorsiklo samtang nagdagan subay sa National Highway sa dakbayan sa Panabo.

Gibutyag ni Major Bautista nga na-verify sa mga traffic investigator sa LTO Panabo diin nakarehistro ang motorsiklo sa rider nga taga Bunawan syudad sa Dabaw nga mihigda samtang nadagan ingun man nakuhan ug video netizen.

Nagkanayon si Bautista nga klaro kaayo sa video nga nakahimo ug reckless driving ang rider diin angayan kining pagasilotan aron magsilbi kining leksyon sa mga motorista sa Panabo City lakip na ang mga naga-agi lamang.

Gidugang sa opisyal nga anaa na sa hurisdiksyon sa LTO Panabo ang pagsilot lakip ang posibling ika-rebokar sa driver license sa rider human kini mihigda ingun man nagsayaw sayaw sa motorsiklo samtang nagdagan nga nagbutang sa kadelikado sa ubang mga motorista’g sakyanan nga nagdagan sa National Highway

Sa kasamtangan naka alarma na sa LTO Panabo ang motorsiklo ug gikatakda ang pag isyu ug citation ticket batok sa rider sa violation nga reckless driving.

RadyoMaN Erin Lumosbog