Davao City – Mag-atubang og kasong kalapasan sa RA 4136 Direct Assault and Disobedience to Person in Authority ang usa ka rider nga si Jhon Mark Delima, 30 anyos, ug backrider Bobby Jones Delima, parehong residente sa Purok 4, Cal Village, Brgy. Tibungco, syudad sa Davao.
Kahinumduman, ang duha gireklamo human nakabangga sa usa ka sakop sa City Transport and Traffic Management Office (CTTMO) nga si Sofronio Taneo Jr., 36 anyos, nagpuyo sa # 14 Limousine St., Sarphil Vill., Brgy. Aquino, Agdao District, ning dakbayan.
Subay sa imbestigasyon sa kapolisan sa Sasa, ang traffic enforcer nag-man sa dagan sa trapiko sa Mamay Road sa Lanang, usa ka single motorcycle ang nagbyahe ug nasayrang wala nag-helmet ang mga sakay ug mipaturatoy og padagan ug wala mihunong hinungdang nabangaan si Taneo (traffic enforcer).
Nadakpan sa mga kaubanan ni Taneo ang driver ug giindosar sa kapolisan sa Sasa samtang ang angkas nakalayas.
Walay gipakitang Official Receipt (OR) ug Certificate of Registration si Delima sa iyang gimanihong motor samtang si Taneo gitambalan sa Southern Philippines Medical Center (SPMC) tungod sa minor injuries nga naangkon niini.
RadyoMan Don Pulayao
