Davao City – Nagpahinumdom karon ang Sasa PNP sa mga motorists nga dili magmaneho kun hubog ug katulugon aron maluwas sa disgrasya.
Nagpanukad ang tambag sa mga otoridad human nasuta nga lango diay sa binong makahubog ang driver sa motor nga mibangga sa truck resulta sa iyang kamatayon sa Km. 11 Sasa alas 12:30 sa tunga sa kagabhion.
Dead-on-arrival nahidangat sa Southern Philippines Medical Center (SPMC) si Marlon Calatrava, hamtong ang pangedaron ug nagpuyo sa Agdao ning dakbayan.
Sa imbestigasyon ni PO1 Abao sa Traffic Section, mupaingon unta sa Panacan ang biktima dihang midasmag kini sa truck nga gidrayban sa usa ka Melvin Tigdo.
Gumikan sa kakusog sa impact sa pagka bangga, dili na maitsura ang motor ug perting lupara sa driver sa motor.
Migula nga nagpositibo sa liquor test ang biktima ug samtang negatibo si Melvin.
Apan bisan paman niini, gibalhog gihapon sa Sasa PNP ang driver nga si Melvin ug hayan pasakaan kini og kaso nga reckless imprudence resulting to homicide karong adlawa.
RadyoMaN Joel Viray
