Dimataling, Zamboanga del Sur – Nagbalik na ang maayong relasyon sa magkaaway nga pamilya sa Barangay Poblacion, Dimataling, Zamboanga del Sur.
Nanguna sa peace dialogue si 2nd District Boardmember Belman Mantos, Dimataling Municipal Mayor Maria Lourdes Baya, 53rd Infantry Battalion sa Philippine Army commanding officer Lieutenant Colonel Marlowe Patria , Dimataling chief of police Jeremias Pepito ug mga Muslim Elders.
Nilagda sa peace covenant ang pamilyang Bonga nga kanhi kaaway sa pamilyang Dris ug Andi nga pulos mga lumolupyo sa Barangay Poblacion, Dimataling.
Kahinumdoman nga kapila na ka higayon nga nagbinalusay ang duha ka pundok gumikan sa personal nga dumot sa pamilya o rido.
Daghang kinabuhi na ang nakalas ug naangol sa engkwentro sulod halos duha ka tuig nga away sa pamilya karun nagkasabot ang duha ka pamilya nga tapuson na ang ilang away ug manginabuhing malinawon.
Nanghinaut usab ang mga opisyal sa militar ug kapulisan nga dili na moulbo ang kagubot sa maong dapit.
