RMN Davao molusad sa ‘Adlaw Sa Pagpasalamat 2017’

3936

 

  Davao City-Agig pagselebrar sa ika-57 anyos nga kasumaran sa kamugnaan sa DXDC 621 RMN Davao ug sa paghatag-bili sa labing ulahing mga kadaugan sa listenership surveys diin pabiling nangharos nga No. 1 ang atong sibyahanan, usaka espesyal nga kasaulogan ang gitagana alang sa katawhan karong Hunyo 28, 2017 sa may NCCC Mall, Davao City.

  Segun kang Ptr. Leobardo Daugdaug, Station Manager ang ‘twin celebration’ pag-rekognisa lamang sa pagbalik-lantaw sa mga mabulokong katuigan kun dul-an unom na ka dekadang pagpanerbisyo sa RMN Davao ngadto sa katawhang Davaoweño ug Mindanaoan.

  Paghatag usab kini og dakong importansya sa walay pag-usab nga pagsalig sa mga radio listeners dinhing dapita sa importanteng papel sa RMN Davao diha sa ilang adlaw-adlaw nga pagkinabuhi.*

   Karong Hunyo 28, ubay-ubay nga mga kalihukan ang ipahigayun kalakip ang Motorcade ingon man mga public services alang sa mga partisipante sama sa Free Medical Check-up, Free Tooth Extraction, Free Massage, Free Haircut, Free reading eyeglasses ug uban pa.

   Kauban usab sa RMN Davao ang mga partner-agencies alang sa libreng inpormasyon ug asistinsiya sama sa Social Security System (SSS), Pag-IBIG Fund Central, Philhealth-XI ingon man ang Public Employment Services Office (PESO-Davao).*

  Usaka highlight ning nasangpit nga selebrasyon mao ang pinasahi nga pasundayag kun Live Variety Show sa duha sa sikat kaayong mga RMN radio drama talents nga sila Allan ‘Goliat’ Nacorda ug Guilly del Mar. Sama sa nanglabay’ng mga katuigan, gilaumang hugopan kini sa daghang mga fans ning pabiling gipili nga Numero Unong radyo estasyon sa habagatan: Ang DXDC 621 RMN Davao!

Facebook Comments