*ISSUE:*
Ika siyam ka tuig nga pagpusil patay ni Kasamang Dennis Cuesta, pabiling walay nahatag nga hustisya.
……………………………………………………………………………..
Karong adlawa Agosto 8,nagmarka ang ika-siyam ka tuig nga kasumaran sa pagka matay ni Kasamang Dennis Cuesta nga gipusil sa riding in tandem niadtong Agosto 4,2008 alas 4:30 sa hapon sa National Highway atubangan sa Gaisano Mall GenSan upat ka adlaw ang milabay human na paralyzed ang pikas bahin sa lawas gibawian sa kinabuhi sulod sa Intensive Care Unit St.Elizabeth Hospital si Kasamang Dennis human maka angkon ug lima ka mga samad pinusilan gamit ang .45 caliber pistol.
Biniyaan ang pito ka mga anak ug asawa hangtud karon pabilin pang nagpaghot sa buwan ang kapamilya niini tungod kay may nakasuhan man nga suspetsado, apan pabiling gawasnun ang akusado sa pagpatay. Ang management sa RMN GenSan nagtu-o nga related sa trabaho isip komentarista ang ana-a sa likod sa kamatayon ni Kasamang Dennis, tungod sa mga dagkong isyo nga gihatagan ug pagtagad sa programa niini sa RMN GenSan kabahin sa kontaminadong tubig sa usa kaBarangay ang pagka missing sa usa ka empleyado sa usa ka car dealer diin ang akusado mao ra usab ang agalon niini nga mi-resulta sa mga death threats nga nadawat u gang kadudahang mga tawo nga gasunod-sunod ni Kasamang Dennis Cuesta.
Tungod sa daghang hulga ang mismong asawa ni Kasamang Dennis Cuesta ang mi advised nga mo undang na kini sa trabaho o kaha magpa reassign sa laing lugar apan nagdumili ang naulahi kay mas gipili niini nga magpadayon sa RMN GenSan sakit nga palandungon nga ang usa ka magsisibya gikutlo-an sa kinabuhi nga igo lamang kining naghimo sa iyang parti isip tigbutyag sa kamatu-oran labina sa gina- practice sa RMN nga walay kinikilingan ug walay gilabanan.
Kung madumduman nga ang Department of Justice DOJ Task Force 211, ang ni filed ug kasong Murder batok ni Retired Police Senior Inspector Redempto Acharon kanhi sakop sa General Santos City Police Office, apan hangtud karon wala gihapon nadakpan ang akusado nga gitu-ohang gun for hire ang sakit nga palandungon kay makita lamang nga naglibod suroy sa Sarangani Province, ang suspetsado nga si Acharon.
Siyam ka tuig na ang milabay apan ang biyuda nga si Mrs.Gloria Cuesta,sa gihapon wala kawad-i sa paglaum na mahatagan ug hustisya ang kamatayon sa iyang bana bisan ug hinay ang pag usad sa kaso. Sa pakighinabi sa RMN GenSan gipadayag ni Mrs.Cuesta nga basin kon masulbad na ang kaso sa pagpatay ni Kasamang Dennis niining administrasyong Duterte, dunay mga update sa kaso nga iyang nadawat busa nagpasalamat na lamang kini na wala malimtan ang kaso sa iyang bana, apan dismayado lamang kini kay hangtud karon wala pa madakpi sa otoridad ang prime suspect nga si Redempto Acharon.
Ngano kahang dili madakpan si Redempto Acharon nga makita raman kono ning tawhana sa Sarangani bisan gani sa General Santos? Dili ba kaha nga kay kanhi ni Pulis maong dili madakop? O kaha dili madakpan kay pag-umangkon sa iladong politiko ug adunahang pamilya sa General Santos? Grabi raba ang storya sa likod human napatay si Kasamang Dennis ,kalit lang giputol sa DOJ ang pagpa-ilawum sa witness protection program ni Bobby Flores kinsa maoy nakasaksi ni S/Inspector Acharon nga maoy nagpusil ni Kasamang Dennis Cuesta. Niabot sab sa punto nga si Mrs.Gloria, Bobby Ramos lakip si Kanhi RMN GenSan Manager Alex Josol giplanohan nga patyon segun sa impormasyon nga gibutyag sa trusted aide ni Acharon nga si Jade Isa. Segun ni Isa nga si Acharon ang utok sa pagpatay ni Cuesta ug may gi- mugnang grupo nga maoy gitahasan usab sa pagpatay ni Flores, Josol ug Gloria Cuesta.
Sa tinuod lang mga kasama dili lalim ang trabaho sa usa ka broadcaster labina kon komentarista ka gumikan kay sa matag adlaw nga imong gihatagan ug pagtagad ang problima sa kuminidad lakip na gani usahay ang problimang personal sa mga modangop ning sibyahan. Sa matag panahon nga dunay mabulgar nga kahiwi-an malipay ang pipila, apan expected nga dunay pipila usab nga masuko tungod kay ma-igo sila sa isyo komentaryo, kon dilikado ang trabaho sa pulis ug sundalo nga mosulong sa panggubatan kami mga komentarista sama usab nga misulong sa pang gubatan diin among kontra ang mga abusadong tawo pribado man o official kini nga mga tawo nga dili makadawat nga nabutyag ang ilang kahiwi-an, sama ni Kasamang Dennis Cuesta, ako usab biktima sa inhustisyang kremin kay hangtud karon ang nagpusil naku ug sa akong 12-anyos nga anak, wala pa gihapon ma- dakpi ug pabiling gawasnon ang mastermind.
Seguro lahi lang ang among dalan ni Kasamang Dennis gumikan kay siya namatay samtang ako gibuhi pa ni Lord, apan pareho ang among kasinati-an nga biktima sa mga abusadong opisyal nga migamit sa ilang gahum aron mopatay bugti sa kwarta ug ilang gahum. Pero ang mga kampon ni Satanas nga nagtago sa pagkatawo sa mga gamhanan tawo kanunay ng gikontrahan sa katarong kay bisan kon namatay man si Kasamang Dennis Cuesta, daghan man gihapon ang mipuli nga tigbalita nga andam ug tagana nga mo butyag sa kahiwi-an, dili mahurot kay kon may mamatay may matawo man.
Sakit nga palandungon nga ang estado mi-ila sa Media nga 4th state, ika-upat nga Estado sa pang goberno apan sa investory of cases of violence against Media nga gisumite ngadto ni Presidente Rodrigo Duterte gikan sa Presidential Task Force on Media Security mo-abot sa 125 ang gipatay gikan sa tuig 2001 to November 2016 apan kon ang tally sa Center for Media Freedom and Responsibility CMFR mokabat sa 228 na ka mga Media worker ang gipangpatay sukad 1986 based on individual victims apil na niini si Dennis Cuesta ug 32-ka mga Media nga biktima sa Ampatuan o Maguindanao Massacre kung diin hangtud karon wala pagihapon maka sinati ug hustisya kay pabilin pang gi-vista ang kaso. Karon may gimugna si Presidente Duterte nga Presidential Task Force on Media Security pinaagi sa pagperma sa AO administrative Order NO.1 may special investigation team nga mag conduct ug lawum nga pagtutok sa kaso labina sa unsolved cases, apan subo nga palandungon kay padayon ang pagpatay sa mga magsisibya.
Gani gahapon lang sa buntag gipusil sa riding in tandem ang reporter sa RMN Cotabato nga si Kasamang Leo Diaz, nagtext pa si Kasamang Leo kang kasamang Michael Suan nga mag report sa programang Sentro Serbisyo, apan dihang gita- wagan ang cellphone ang anak na ang mitubag ug nagpahibalo nga gipusil na ang iyang amahan nga si Kasamang Leo Diaz. Adtong Agosto 3, patay usab ang editor sa Business World nga si Michael Marasigan ug iyang igsoon nga si Christopher Marasigan nga gi-ambush sa wala pa mailang suspetsado sa Sta.Lucia San Juan.
Segun sa Aljazeera sa mi-aging 2015 mokabat sa 110 ka mga journalists ang mga gipangpatay sa tibuok kalibutan sa maong data ang pilipinas ana-a sa ika walong pwesto world’s deadliest countries in the World o pinaka kuyaw nga nasud alang sa mga tigbalita, una niini ang Iraq,Syria, France,Yemen,South Sudan,India, Mexico, Philippines ug Honduras, sa 195 ka kanasuran sa tibuok kalibutan ang Pilipinas ika- walo nga deadliest Country sa tibuok kalibutan, ang Pilipinas usab ang ika 13-nasud nga may pinakadaghan papulasyon 103,796,832 M o 1.4 % sa global population.
Hangtud kanus-a kaha ma-undang ang pagpatay sa mga tigbalita, kanus-a kaha madakpan ug madugta sa bilanggo-an kining mga tawong gahimo ug binuang mga pagpangabuso, apan dili makadawat sa kritiko nga maoy bunga sa ilang dautan nga binuhatan, hinoon para naku ug sa uban pang Mediaman ang kamatayon dili maka buntog sa atong ka-usa kay kon dunay mamatay, apan dunay matawo aron maoy mopadayon sa kausa, sa katapusang mga adlaw ang dautang binuhatan aduna may kinutuban, seguro una-una lang ang panahon kay kitang tanan pulos mo atubang sa baba sa kamatayon, masaligon kita mga kasama nga padayon ang pag serbisyo bisan pa kon ibala sa kanyon!
