Davao City – Gikalipay karon sa mga apektadong residente sa Barangay Balnate ug Barangay San Miguel, Magsaysay, Davao del Sur ang dugang hinabang nga natunol ngadto kanila sa RMN Davao ug RMN Butuan ning labing ulahi.
Ang mga natigom nga donasyon gikan sa mga nagpakabanang katawhan gipaagi sa RMN Foundation ilawom sa nagpadayong ‘RMN Oplan Tabang’ relief assistance distribution kagahapong adlawa, November 28.
Sumala sa usaka residenteng nahinabi sa DXDC RMN Davao giila nga si Melanie Noe, 39 anyos, dakung tabang alang kanila ang mga relief goods ilabi na ang mga pagkaon, sinina ug uban pang mga nag-unang panginahanglanon.
Padayon usab nga nanawagan sila si Melanie, Nanay Rosita Ole ug uban pang mga apektadong residente og dugang hinabang uban ang ilang panghinaut nga makabalik na sila sa ilang tagsa-tagsa ka mga panimalay sanglit ang uban kanila, nagkasakit na tungod sa tumang kainit sa lugar ug dili komportableng sitwasyon ilabi na sa aspetong panglawas diha sa evacuation center.
Pikas bahin, mapasalamaton si Magsaysay Municipal Information Officer Anthony Allada sa dugang asistinsya nga ilang nadawat gikan sa RMN Networks.
“Daku kaayo ang among pagpasalamat sa RMN Davao ug RMN Butuan nga nagpadala og mga hinabang sa Magsaysay… Nagkinahanglan gyud og ayuda sama sa food packs, tubig ug mga relief items ug unsa pay mapaabot dinhi…Welcome kaayo na sa among lugar,” segun ni Allada.
Alang usab niadtong buot pang motunol sa ilang donasyon or tabang, mamahimong makig-koordinar lamang sa DXDC 621 RMN Davao pinaagi sa RMN Foundation ug mamahimong i-course ang inyong mga donasyon sa RMN Davao station nahimutang sa RMN Broadcast Center, kanto Anda-Bonifacio Streets, ning syudad or mutawag sa contact number nga 227-4571.
RadyoMaN Renz Barbarona
