Roxas City, Capiz- Nakakuha sang 95.41 ka prosyento nga “compliance rating” ang Roxas Memorial Provincial Hospital diri sa syudad sang Roxas sa implementasyon sang “No Balance Billing” nga polisiya sang Philippine Health Insurance Corporation (PhilHealth) sang nagligad nga bulan sang Hunyo. Ang mataas nga rekord sa implementasyon sang NBB ang naglapaw pa sa 93.38 ka porsyento sang RMPH nga nakuha sa bulan sang Marso 2020 base sa report nga ginpagwa sang PhilHealth. Samtang ang pagtimbuok kag paglapaw sang RMPH sa 80 ka porsyento nga compliance rate nga requirement sang PhilHealth sa NBB ang na-rekord matapos ang isa ka bulan nga ginlunsyar ang Malasakit Center para sa Capiz nga ginpangunahan nanday Senador Lawrence Christopher “Bong” Go kag Presidential Assistant for the Visayas Sec. Michael Lloyd Dino bilang mga dinapit nga bisita sadtong Pebrero 17 sa RMPH. Ang ika-63 nga Malasakit Center nga isa ka one-stop shop para sa medikal kag pinansyal nga bulig ang may P5 ka milyon nga bulanan nga pundo para sa mga pigado nga pasyente. Ginpahayag ni Rances Therese Miranda nga administrador sang ospital, sa interview sang Capiz Kabalaka Information Center, nga ang Malasakit Center ang may dako nga bulig agud nga mahatag sang ospital ang mga kinahanglanon sang pasyente nga mga bulong, kagamitan kag serbisyo. Subong man ginkilala man ni Miranda ang kontribusyon ni Gobernador Esteban Evan Contreras sa kadalag-an sa NBB pinaagi sa pagpanikasog agud nga madayon ang Malasakit Center para sa probinsya kag superbisyon nanday Dr. Ramon Alex Nolasco nga assistant head sang Hospital Management Section sang lokal nga panguluhan sang probinsya kag Dr. Edmarie M. Tormon nga OIC Chief sang RMPH nga nag-giya sa mga empleyado agud mangin dedikado kag lubos nga ipatuman ang NBB nga polisiya. Ang NBB ang nagatuyo nga mahatagan sang kumpleto kag libre nga serbisyo ang tanan nga kwalipikado nga miyembro nga na-admit sa ward ukon service bed sang mga ospital sang gobyerno agud nga wala na sang bayaran pa nga hospital bill sa ti-on nga magwa na sa ospital. Gindugang pa ni Miranda nga sa mataas nga compliance rate sang RMPH, nagakahulugan nga madamo sang mga imol nga pasyente ang naserbisyohan sang ospital nga wala sang ginbayad nga kwarta nagikan sa ila mga bulsa.
via- PIA Capiz/Alex Lumaque
