Davao City – Problema gihapon hangtud karon sa Bureau Fire Protection (BFP) ang gagmay nga mga dalan ug daghang mga behikulo sama sa mga nagbahis-bahis ug naka-parking nga mga trisikad diha sa alleys sa mga barangay nga maoy hinungdan nganong malangay ang ilang pagresponde sa mga insidenteng sunog.
Matud ni BFP-Davao Senior Fire Officer 2 Ramil Gillado, dugay na nilang suliran ang kapi-ot sa mga dalan diha sa mga barangay ug dugang pa ang mga sakyanan nga nag-parking hinungdan nga malangay og sulod ang ilang mga fire trucks diha mismo sa fire scene.
Kumpleto sa pagbansay ug kahibalo ang mga firemen sa syudad sa Davao gane ang BFP ug Central 911 nagbaton usab og modernong kagamitan nga pangontra sa sunog ug pang-rescue niadtong mga mabiktima sa sunog.
Apan ang tanang bentaha sa kahibalo ug paggamit og moderno nga mga kagamitan ug mga ekipo batok sunog mahulog ra nga daw walay pulos kung dili mapalapdan ug mapadaku ang mga alleys ug mga dalan sa mga barangay sama pananglitan sa mga barangay sa Boulevard area, matud ni Gillado.
Dugang ni Gillado nga aron matubag ang ilang problema, gilusad sa kabumberohan denhe ang programa nga ‘Oplan Ligtas Pamayanan’ nga nagtumong sa pagpasabot sa kamahinungdanon sa pagpalit og mga modern, well-equipped fire trucks sa mga kabarangayan.
Ubos sa maong programa, lakip edukahon ang mga residente sa angay nilang himoon panahong adunay sunog sanglit matag mo-ulbo na lamang sa sunog, ang mga tawo inay nga magtinabangay og palong sa kalayo, maglumbaanay na man hinoon og paggawas sa ilang lugar resulta nga mudako og samot ug dili na matabang og palong sa kabumberohan ang pagdilaab.
Matud sa ubang tigpaniid, angay usab nga pahinumdoman ang katawhan nga respetohon ug dili but-an ang bumbero sanglit dihay mga higayon nga ilogon sa tawo ang hose nga gunit sa firefighters aron seguraduhon pagsalbar ang ilang mga panimalay.
Gane, kahinumdoman nga natawo ang sugyot kun ideya nga armasan ang mga firemen aron makabaton sila og igong depensa kontra risgo panahon nga sila hasi-on sa pipila ka mga pasaway nga residenteng nasunogan.
RadyoMan Joel Viray
