Davao City – Wala na nagpaabot ang lokal nga kagamhanan sa siyudad sa Davao sa kamanduan gikan sa Department of Interior and Local Government (DILG) aron limpyohan ang mga public roads gikan sa mga street vendors ug uban pang matang sa obstructions.
Gibutyag ni Davao City Demolition Unit Head Paul Bermejo nga sa wala pa ang direktiba sa DILG, ang kagamhanang lokal sa siyudad nanilhig nang daan sa tanang mga vendors nga naninda diha daplin sa mga kadalanan subay sa tahas nga gihatag ni Mayor Inday Sara Duterte-Carpio ngadto sa City Demolition Unit.
Matud ni Bermejo nga bisan pa sa panahon sa kanhi mayor nga si Pres. Rodrigo Duterte, ang dakbayan Davao gawasnon na sa presensiya sa mga streets vendors diha daplin sa mga kadalanan.
Gipasigarbo ni Bermejo nga hinlo na kaayo ang siyudad gikan sa mga street vendors diin ang mga na-demolish sa mga dalan napahiluna na didto sa Roxas Night Market.
Nakig-alayon na usab ang Demolition Unit sa City Traffic and Transport Management Office aron maseguro ang kalimpyo sa mga dalan gikan sa mga sakyanan nga iligal nga nagparking.
Gani, mas gipahugtan pa sa maong buhatan ang pag-demolish sa mga istruktura nga iligal gitukod sa mga vendors daplin sa mga dalan karon nga pila na lang ka adlaw magbukas na ang Kadawayan Festival 2019.
Nagbahad si Bermejo sa mga indibidwal nga mangahas sa paggamit sa dalan aron sila makatinda nga dili sila mag-duhaduha sa pagkumpiska sa ilang mga baligya sama sa ilang gibuhat sa miaging katuigan.
Uyon usab si Bermejo nga silotan ang mga opisyales sa lokal nga dili makabakwi sa public roads gikan sa pag-okupar sa mga vendors ug sa mga behikulo nga iligal nga nagparking sa mga dalan.
RadyoMaN Joel Viray
