Davao City – Alang sa pamunuan sa Southeastern Mindanao Diversified Drivers & Operators Cooperative (SEMDDOC) nga disgrasya gayud ang nahitabo sa pagsungag sa Hino Van sa Ten-Wheeler Truck nga gikamatay sa 14 ug pagka-angol sa unom ka pasahero sa Sta. Cruz, Davao del Sur.
Gibutyag ni SEMDDOC President Maning Duran nga walay driver nga makalingkawas sa disgrasya bisan pa og hanas na kini sa pagmaneho diin ang pagkabangga sa Hino Van sa Ten-Wheeler truck nagpamatuod lang nga ang disgrasya muabot sa wala laumi nga panahon.
Hinoon gisulti ni Duran nga pwede malikayan ang disgrasya kun dili abusado ang driver apan kun kaskasero hayan peligro gayod ang abuton sama sa Hino Van nga wala na makontrol sa driver nga si Ariel Prestores ang manibela ug diretso kining nibangga sa truck nga gikamatay ug gikaangol sa mga trabahante sa Franklin Baker.
Gipasabot ni Duran nga sagad sa hinungdan sa disgrasya mao ang driver’s error diin usa sa sayop nga pagmaneho mao ang pugoso nga pagdrive bisan og katulugon o dili ba kaha naka-inum.
Kung ang driver anaa niini nga estado taas gayod ang risgo sa maduguon nga disgrasya hinoon dili una buot mokumento ang Pango sa SEMDDOC kun mao ba kadto ang kondisyon sa driver sa Hino Van dihang nibangga kini sa truck nga puno og karga sa bakal.
Sa mga highways talagsa ra sa mga drivers magpahinay og dagan apan sagad magpaturatoy gayod taliwala sa gisulti sa balaud nga angay gihapon tumanon ang speed limit sa mga kadalanan aron malayo sa disgrasya.
Usa sa nakitang problema ni Duran mao nga walay nagapondo nga Highway Patrol Group (HPG) o dili ba kaha mga enforcers sa Land Transportation Office (LTO) aron mao untay musita sa mga drivers nga abusado ug kaskasero magpadagan sa dalan.
Nanawagan si Duran sa mga buhatan sa LTFRB ug sa LTO nga maglusad og seminar sa tanang mga drivers ug mga operators aron subling isilsil sa ilang mga alimpatakan ang mga balaud nga hugot nagdili sa paspas nga dagan ug uban pa.
Sa ingon niini nga paagi, daghang mga kinabuhi ang masalbar gikan sa kaskasero nga mga drivers nga maoy sagad malambigit sa dugoon nga disgrasya sa kadalanan sama sa nahitabo sa Sta. Cruz, Daval del Sur.
RadyoMaN Joel Viray
