Davao City – Wala mapugngi sa mga sakop sa Davao City Auxiliary Police ang mga tawo nga nag isig-hakotay sa mga botelya sa kape nga nagpasad sa kalsada sa Lanang ning dakbayan pasado alas 4:00 sa kadlawon.
Taliwala sa presensiya sa mga pulis uban sa mga auxiliary padayon nag-isighakutay ang mga tawo sa pagkuha og daghang botelya sa kape diin ang uban sinako ang nadala.
Nalagpot og pila metros samtang nagbalintong ang panel nga iya sa RAM-T Traders nga dunay plaka nga RMC 451 human nabanggaan niini ang Crosswind ganinang ala 1:00 sa kadlawon sa mao nga lugar.
Gumikan sa kakusog sa impact, perting gubaa sa kilid sa panel resulta nangahabwa ang kinarton mao nagkatag ang botelya sa kape ug ang buak nga mga bildo sa panel ug sa Crosswind.
Samdan matud pa ang driver sa Crosswind kinsa daling gidala sa Southern Philippines Medical Center (SPMC) ug samtang ang driver sa panel dali misibat human sa mao nga panghitabo.
Naghaguros matud pa ang dagan sa panel gikan North-bound dihang nabanggaan ang Crosswind nga gikan sa Southbound area samtang paliko paingon sa Fortune Homes sa Lanang ning dakbayan.
Padayon pa naghimo og dugang pagpanubay ang Sasa PNP labot sa mao nga panghitabo.
RadyoMaN Joel Viray
