Davao City – Taliwala sa seryosong kampanya ug pagpapatuman sa mga traffic ordinances dinhi sa syudad partikular na diha sa pedestrian lanes ug traffic lights, aduna gihapoy mga buluyagon kun mga pasaway.
Sa pakighinabi sa ‘Straight to the Point’ radio social commentary program ngadto sa hepe sa City Transport and Traffic Management Office (CTTMO) Dionisio Abude, gibutyag niini nga mayoriya sa mga Davaoeño disiplano apan ubay-ubay gihapon ang ihap sa mga nadakpan sa mga traffic enforcers.
Base sa rekord sa CTTMO, daku ang pagkunhod sa mga nadakpang nag-jaywalking diin niadtong Enero hangtod Marso 2018, mokabat sa 12,000 ang nasikop samtang sa susamang period sa 2019 aduna nalang 2,706 violators ang natiketan.
Matud ni Abude, daghang pedestrian lanes ang gimuntar karon sa syudad hinungdan nga nitabok kadaghanan sa saktong agianan.
Kung aduna may nagpabilin nga sakit sa ulo sa mga traffic enforcers, mao kini sila nga mga salawayong drivers.
Matud ni Abude kining mga naka-seminar nga mga drayber sagad maoy mga disiplinado ug mu-give way ngadto sa mga manabok sa designated areas.
Sa 2018 nga datos sa CTTMO nahilakip ang ‘beating the red lights’ sa ‘reckless driving’ nga rekord diin nakadakop sila’g 2,540 ka mga drayber.
Nag-unang mga bayolasyon sa mga drivers ang wala pagtuman sa mga traffic signs, obstruction, walay helmet, speed limit ug illegal parking.
RadyoMaN Aimee Guinita
