ROAD TO SAINTHOOD | Pinoy teenager, gindeklarar sang Vatican bilang ‘Servant of God’

66

Roxas City, Capiz – May posibilidad nga madugangan ang numero sang mga Filipino nga Santo.
Ini matapos nga gindeklarar sang nakaligad nga Marso 29 sang Prefect of the Congregation for the Causes of Saints sa Vatican si Darwin Ramos bilang isa ka ‘Servant of God’.
Base sa report sang CBCP News, ginpahayag ni Cubao Bishop Honesto Ongtioco nga ginapasugoran na sa Diocese of Cubao ang proseso para sa beatification kag canonization ni Ramos.
Si Ramos ang ginpanganak sadtong Disyembre 17, 1994 sa Pasay City kag sa lamharon nga edad nangin basurero/manug-scrap ini agud lamang makabulig sa iya pamilya.
Nag-angkon ini sang balatian nga ginatawag nga Duchenne muscular dystrophy nga nangin kabangdanan para indi makatindog kag maghina ang muscles.
Tuig 2006, nangin membro si Ramos sa isa sa mga centers sang Tulay ng Kabataan (TnK) nga nagabulig sa mga batang kalye kun sa diin nadiskubre sini ang pagtuluohan nga Katoliko sang 2007 kag sa nasambitan man nga tuig nabaton ang sakramento sang bunyag, komunyon kag confirmation.
Makaligad ang pila ka ka tuig, naghina pa si Ramos apang padayon nga nangin halimbawa sa staff kag pareho nga kabataan sa ginatapoan nga charity group.
Ginsiling ni Bishop Honesto Ongtioco nga sa pihak sang balatian, mas labi pa nga nagbakod ang pagtuo ni Ramos sa Diyos.
Nagtaliwan si Ramos sa Philippine Children’s Medical Center sa Quezon City sadtong September 23, 2012 sa edad nga 17.
Suno pa kay Bishop Ongtioco, huwaran sang pagka-sainthood si Ramos nga sa pihak sang kabudlayan kag kalipay padayon nga nagatuo sa Diyos.


<www.avast.com/sig-email?utm_medium=email&utm_source=link&utm_campaign=sig-email&utm_content=webmail>

Facebook Comments