*General Santos City—Gibutyag ni City Councilor Atty. Dominador Lagare Jr. ang chairperson sa transportasyon sa konseho nga nahidangat sa dakbayan ang mga personahe sa Departm of Science and Technology aron sa pagpahigayon ug site inspection kung asa ipaagi ang road train nga ipahulam niini sa syudad.*
*Sumala kang Kagawad Lagare nga sa kasamtangan, anaa sa syudad sa Cebu ang maong road train ug nakatakda kining ipadala dinhi sa dakbayan kung asa mukabat sa 2.8 milyon ka pesos ang transportation cost niini ug kini ang gastuhan sa DOST.*
*Dugang pa ni Kagawad Lagare nga ang maong road train ang nagkantidad ug 45 milyones ka pesos kung asa kini ang nakatakdang ihatag sa DOST sa dakbayan sa Gensan sunod nga tuig kung kini dawaton sa syudad.*
*Kahibaluan nga mukabat sa lima ka bulan nga ipahulam sa dakbayan ang maong himan kini aron masayran kung makahatag kini ug solusyon sa hilabihang problema sa trapiko.*
*Kung asa gibutyag ni Kagawad Lagare nga mas maayong ipaagi sa national highway ang maong road train aron nga mahatagan ug pabor ang mga pasaherong sagad gaadtuan sa mga lagyong dapit sa syudad sama nalang sa Fishport.*
*Gipasigarbo man usab niya nga kung adunay lugar sa nasud nga makaangkon ug road train, kini mao ang GenSan gumikan sa mga lagpad niining dalan kung itandi sa uban.*
*Apan, giangkon sa nasangpit nga opisyal nga wala gyuy nag-inusarang solusyon sa problema sa transportasyon ug ang maong road train ang usa lang sa ilahang mga ginakonsidera nga solusyon.*
