Cuartero, Capiz- Kabug-osan nga P30, 000 pesos nga cash ang natigayon nga matangay sa mag-utod matapos ang mga ini ang gin-hold-up sa Brgy. Lunayan Cuartero alas 7:30 sang gab-e.
Natabo ang amu nga insidente samtang nagapauli na ang mga biktima nga ginkilala kanday Jeanne kag Argie Falcis y Bermudo nga residente man sang amu nga lugar. Ang mga ini ang halin sa banwa sang Maayon nga nagpakambiyo sang kwarta.
Ginpahayag ni PO3 Edmer Dayalo sang Cuartero PNP, ginasubay sang mga biktima ang dalan pauli sa ila poluy-an sang hinali gin-banggaan ang mga ini sang tatlo ka mga suspek nga ginkilala kanday Jeric Fusin y Falcis, Roberto Dalayac y Dolorico kag Barmi Dalayac.
Armado sang wasay kag kahoy, ginlamposan sang mga ini sa kamot ang driver nga si Argie Falcis nga naigo sa kamot antes nga gin-agaw ang sling bag kay Jeanne kun sa diin nabutang ang cash kag mga IDs.
Matapos ang insidente madasig nga nagpalagyo ang mga ini.
Suno sa pahayag sang mga biktima, antes ang insidente una nga nakit-an ang tatlo nga naga-inom sa tyangge nga malapit sa ila lugar.
Nahibaluan dugang nga may yara na sang dugay nga indi paghangpanay sa pamilya sang mga ini makaligad nga ginbuno sang isa sa mga suspek ang membro sang pamilya sang mga biktima.
