Davao City – Karga karon sa abaga sa atong mga kaigsoonang Maranao ang dakong problema kun sa unsa nga paagi sila makabangon gikan sa paglukapa sa mapait nga kasinatian sa giyera human walay nabilin kanila nga mga balay ug panginabuhian.
Kung si Vice President Lenie Robredo ang pasugyuton, mas maayo i-preserba na lamang ug dili na lang i-rehabilitate ang Marawi City ug magtukod na lamang og bag-ong Islamic City.
Apan supak si Bishop Oscar Cruz niini sanglit walay katungod si VP Robredo nga unhan ang mga Maranao sa ilang hukom.
Walay laing paminawon ang obispo gawas sa mga Maranao kay sila ang apektado sa baguhay nahuman nga lima ka bulan nga giyera diin saksi ang mga abog kung unsa kaguba ang ilang siyudad.
Kun aduna ma’y dili malimtan ang mga Maranao kana mao ang pagkabungkag sa ilang mga panimay dala sa giyera tali sa mga sundalo ug Maute group.
Ang pinakasakit niini mao ang niluog nga binuhatan sa mga terorista ngadto sa mga bihag diin daghan sa mga kababainhan ang gilugos ug gipamatay ug gipamutlan og ulo ang mga kalalakin-an.
Bisan pa og pila ka bag-ong Islamic City ang itukod base sa sugyot ni VP Robredo magpabilin mutatak sa butikmaot nilang kagahapon ang nahitabo sa ilang gipangga nga dakbayan.
Wala malipay ang kanhing presidente sa Catholic Bishops’ Conference of the Philippines (CBCP) sa mga kanasuran nga nagdonar sa nasud og mga armas, daghang mga bala, mga sakyanang panggiyera ug daghan pang uban.
Dakong salapi ang gikinahanglan karon aron madugangan ang pila ka bilyon ka pesos nga gi-alokar sa gobyerno nga dakong tabang sa pagtukod pag-usab sa hayag nga kaugmaon sa Marawi City.
Kun aduna ma’y pinakanindot nga pagtulun-an nga mamahimo natong makutlo gikan sa mangilngig nga kaagi sa Marawi City, kana mao ang panaghiusa natong mga Pilipino sa walay pagpihig ma-Muslim man, ma-Lumad o ma-Kristiyano diha sa pagyatak sa mga terorista.
RadyoMaN Joel Viray
