Davao City-Seryuso ang Police Regional Office XI sa paggukod sa mga police scalawags nga nalambigit sa iligal nga droga ug uban pang mga hiwing binuhatan sa ilang han-ay.
Gibutyag ni PCI Andrea Dela Cerna tigpamaba sa PRO-XI nga ang Counter-Intelligence Task Force hugot nga nagmonitor sa tanang pulis sa Davao Region diha sa ilang mga aktibidad.
Sa dul-an otso mil ka mga police sa rehiyon, tulo niini gipahamtangan na og silot human nga nagpositibo sa iligal ng droga atol sa random drug test.
Giawhag usab ni Dela Cerna ang publiko nga isumbong kung aduna may mga impormasyon kalabot sa mga police scalawags aron ila kining maimbestigahan.
Dugang niini nga anaa ang R7 ug PNP-Internal Affairs Service nga muimbestiga ug mututok sa mga kaso sa mga pulis dinhi sa Davao Region.
RadyoMan Aimee Guinita
