Davao City – Walay gihawirang actual nga assessment ang Department of Interior and Local Government (DILG-XI) sa sitwasyon karon sa rehiyon apan subay sa obserbasyon, hinay-hinay nang mibakod ang sitwasyon sa Davao gikan sa pagkahapla niini human hampaka sa COVID-19 crisis.
Indikasyon nga mibalik na sa naandang aktibidad mao ang serbisyo sa mga lokal ug nasudnong buhatan sa gobyerno nga karon natilawan na og balik sa katawhan, matud ni DILG-XI Regional Director Alex Roldan.
Segun ni Roldan, dili lamang ang mga opisina sa kagamhanan ang nibalik apan bisan pa ang mga industriya sama sa mga malls ug mga restaurants ug daghan na usab ang nakabalik sa mga trabaho.
Samtang talagsa na lang pod makadawat og reklamo ang DILG gikan sa mga tawo nga nagmulo sa pamaagi sa mga checkpoints diin timailhan kini nga anaa na sa normal ang kahimtang sa Davao Region.
Ang DOLE-XI namahayag nga kapin 10,000 ka mga kompaniya ang nanirado ug kapin 300,000 ka mga trabahante ang nawad-an og trabaho isip epekto sa pila ka bulan nga lockdown ug quarantine dala sa COVID-19.
Sumala ni Roldan, magpasalamat gihapon ang mga Davaoeño tungod kay halapad kaayo ang yuta sa Davao Region nga puwedeng umahon isip alternatibo alang sa mga tawo nga naglisod karon.
Hinonoa, ang hangyo ni Roldan ngadto sa publiko nga tumanon ang physical distancing ug ang pagsuot og facemask ug ang ubang trabaho sa balay na lang himoon isip mao na’y sundon sa tanan nga normalidad.
Dugang ni Roldan nga mitabang na ang ilang buhatan aron ipursigi ang pagpalambo sa ekonomiya sa mga lokalidad sa rehiyo alang sa hingpit nga pagbalik sa nindot nga kinabuhi sa tanang katawhang gihasi sa makamatay nga kagaw.
RadyoMaN Joel Viray
