Davao City – Sa progresibong kanasuran sama sa Piliipnas diin grabe kainit ang pulitika tungod sa hugot nga pag-inilugay sa mga posisyon nga gilansaran, musangko gayod sa kaguliyang ug madugoon nga panghitabo ang piniliay sa nasud.
Dili magduha-duha ang mga partido sa pagbuhi og dakung kantidad sa salapi aron mamalit og boto ug pagpatay sa kontra ug sa mga suporters niini aron masiguro ang ilang kadaugan sa eleksyon.
Ning maong scenario, dakung tabang sa Commission on Election (COMELEC) ang citizens’ arm sama sa National Citizens Movement for Free Election (NAMFREL) ug sa Parish Pastoral Council for Responsible Voting (PPCRV) alang sa limpyo, matinud-anon ug malinawon nga piniliay sa Pilipinas.
Bug-at ang papel sa mga poll watchdogs sama sa NAMFREL kay daghan sila’g bantayan aron dili makapanikas ug maka maniobra sa dagan sa eleksyon ang matag kampo, suma ni NAMFREL Focal Person Erik Alvia.
Dakung trabaho ang voters education campaign kansang tinguha mao ang pagpahamtong sa mga botante diha sa pagpili sa mga kandidato nga walay bugting salapi isip bayad sa boto.
Matud ni Alvia, kauban sa ilang adbokasiya ug paghigugma sa nasud ang risgo ug hulga sa mga politiko nga masita tungod sa gihimong mga binuang samtang ginapahigayon ang piniliay.
Segun ni Alvia, lunlon libre ug walay honorarium ginadawat ang mga volunteers sama nila sa NAMFREL apan wala nila kini gigisapayan basta ang importante mabantayan ang kasagrado sa eleksyon.
Dugang ni Alvia nga dili mabayran og salapi ang ilang kalipay ug dungog nga sila nahimong kabahin sa hinlo, matinud-anon ug malinawon nga piniliay ug kini baunon nila sa tibuok nilang kinabuhi.
Ang eleksyon simbolo sa kagawasan ug demokrasya diin ang matag Pilipino gihatagan og katungod nga makapili sa kandidato nga buot niyang palingkuron sa renda sa panggamhan.
Mihangyo si Alvia sa mga botante nga dili ibaligya ang boto ug hatagan og bili ang kaugmaon sa nasud ug sa sunod pangkaliwatan sa mga Pilipino.
Responsable nga pagboto ang gikinahanglan karon sanglit kung masipyat og pili ang pangandoy alang sa maayong kaugmaon maguba unya ang kaugmaon sa atong katawhan, dugang sa poll watch advocate.
RadyoMaN Joel Viray
