BACOLOD CITY – Ginbuno sang isa ka roomboy ang iya kaupod man nga roomboy kagab-i sa isa ka pension house sa area sang Brgy. Villamonte, Bacolod City.
Ginkilala ang biktima nga si Resty Natuel, legal ang edad, tumandok sang Brgy. MH del Pilar, Pontevedra samtang ang suspek naman nakilala kay Arnold dela Cruz, 31 anyos, taga Brgy. Malvar, Pontevedra kag lunsay nagatrabaho bilang mga roomboy sa Tindalo Pension House sa Brgy. Villamonte.
Suno sa imbestigasyon may mga las 10:20 kagab-i, ang biktima ang yara na sa worker’s room sa 5th floor sang amo nga pension house kag nagapahuway-huway.
Apang, nagsaka man didto ang hubog nga suspek nga si dela Cruz kag sa wala mahibaluan nga motibo, iya na lamang ginbuno ang biktima nga nag-angkon sang pilas sa likod sang iya wala nga abaga kag sa idalum sang iya wala man nga kilid.
Gindala sa Corazon Locsin Montelibano Memorial Regional Hospital ang biktima samtang ang suspek naman detained karon sa custodial facility sang Police Station 4.
Na-recover sa scene of the crime ang isa ka kutsilyo nga nagalaba sang kapin ten inches./dyHB BACOLOD
