Ni-arangkada na karon ang back channel informal talks tali sa mga peace negotiators sa gobyerno sa Pilipinas ug sa mga counterparts niini sa Philippine Communist Left ilawom sa landong sa CPP-NPA-NDFP.
Sa presser sa palasyo sa Malacanang, gisugilon ni Presidential Spokesperson Harry Roque nga subay sa mando ni Pres. Rodrigo Duterte alang sa peacetalks resumption, atua na karon sa Europe ang mga representante sa estado.
Gilauman nga sa dugay ug sa madali, mapanday ra pag-usab ang bag-ong negosasyon tali sa duruha ka nagkabanging pundok haron sulayan pag-usab sa pagdistrungka sa pinakakaraang Maoist communist insurgency sa entero Asya-Pasipiko karon.
Sa pikas bahin, pormal na nga paga-ilhon sa gobyerno sa Pilipinas karong Mayo 15 ang Benham Rise ngadto sa bag-ong bansagon niini nga Philippine Rise.
Segun sa tigpamaba sa pamuno-nasud, ang presidente personal nga moduaw sa Philippine Rise karong Mayo 15-16 uban ang 50 ka mga Filipino scientists kinsa mohimo ug makuting pagtoon kun research sa prospects ug potentials sa maong area nga buhong sa mga aqua-marine resources.
Sa isyung Dengvaxia controversy, gimando usab sa pamuno-nasud ang pagmugna ug three-man panel of experts langkuban sa mga independiyenteng Asian medical experts kang kansang ‘expert opinion’ ug mga rekomendasyon kalabot sa iskandalo maoy hugot paminawon sa pangulo sa nasud.
RadyoMaN June Duterte
