Subling gitataw karon sa Malacañang nga walay basihan ang pagduda kun suspetso nga parte sa game plan sa rehimen ang pagpalugway sa pamunuan ni Pres. Rodrigo Duterte gawas sa single six-year term nga gilatid sa balaud.
Sa news briefing dinhi sa syudad sa Davao, gibatbat ni Presidential Spokesperson Harry Roque nga sa makadaghang higayon, gi-anunsyo na sa pangulo nga andam gani kining pamub-an ang iyang termino ilabi na kun mahikutar ug mapundar na unya ang inisyal nga istruktura sa giukasugyot nga ‘change of form of government’ gikan sa presenteng unitary-presidential-bicameral system ngadto sa federal system.
“The idea of prolonging (the President’s term) is out of the question,” pagtino ni Roque.
Una niini, natay-og ang sektor sa political opposition sa dihang ninggula ang mga huhungihong nga kabahin sa Duterte gambit mao ang ten-year term extension sama sa gikabalak-an sa pipila ka mga senador.
Mismong si Senate President Aquilino ‘Koko’ Pimentel gi-quote nga posible ang term extension scenario kun gikinahanglan sa transition period paingon ngadto sa usaka federal form of government.
Sa nagpadayong imbestigasyon sa NCCC Mall fire incident nga nikostar sa 38 ka mga kinabuhi, gibutyag sa tigpamaba nga gitagbo lamang sa pamuno-nasud ang mag investigators aron sutaon ang development sa imbestigasyon sa tinguha nga makab-ot ang kamatuoran sa insidenteng nitay-og sa katawhan ug naghatud ug daghang mga pangutana sa posibleng kakulangon kun lapses sa fire safety standards.
RadyoMaN June Duterte
