Gihagit karon ni presidential spokesperson Sec. Harry Roque si impeached Supreme Court Chief Justice Maria Lourdes Sereno nga moluwat na kun mo-resign na sa iyang pangatungdanan sa labing hataas nga hukmanan sa nasud.
Sa news briefing sa palasyo, gibatbat ni Roque nga malisud ang mamahimong epekto o implikasyon sa mamahimong resulta sa ikaduhang impeachment proceedings kontra sa usaka sitting chief magistrate human nga unang gisipa sa pwesto si anhing Chief Justice Renato Corona.
Matud ni Roque, walay laraw ang executive department nga molapas sa ‘judicial independence’ sa hudikatura kun mo-intervenir sa kalihukan sa laing sanga sa pangagamhanan kon dili mao lamang ang pagpadayag sa unsay gibati ug gituhoan sa ehekutibo sa Sereno impeachment case.
Pikas bahin, wala gikabalaka sa palasyo sa Malacañang ang usa ka survey nga nagpakita sa matud pa pagkanaug sa perception sa katawhan sa katakos sa Duterte administration nga sulbaron ang tanang mga panaad niini ngadto sa katawhan.
Kumbinsido ang tigpamaba nga mismong ang tawo nadawat ang maayong epekto sa war on drugs diha sa gibating seguridad sa mga lungsuranon bisan pa man kun dili kalikayan ang bati-ong kabalaka sa extra-judicial killings kun vigilantism.
Sa isyung ‘healing rally’ sa mga taga-simbahan kagahapon, gitino ni Roque nga gi-respetar sa Malacañang ang ‘free expression’ sa mga kritiko sa gobyerno sama niadtong mga anaa sa political opposition nga nakighiusa sa religious sector.
RadyoMan June Duterte
