Sumala ni Ret. Col. Dionisio Abude Jr., hepe sa CTTMO, nga andam na ang rota sa tulo ka course sa triathlon sama sa langoy, dagan ug pagbesiklita.
Matud ni Abude nga sugdan ang pagsira sa mga kadalanan nga maoy rota sa Ironman 2023 alas 3:00am karong Marso 24, 2023 ug pagaablihan kini sa mga motorista inig maka agi na ang katapusang triathlete.
Nagkanayon ang hepe nga labihan ang paningkamot sa iyang buhatan tungod kay ang lumba manukad sa Davao City lahos sa Tagum City Davao Del Norte ug balik sa syudad sa Dabaw.
Gibutyag sa opisyal nga 3:00AM hangtud 10:30am sirado na sa mga motorista ang southbound alang sa bike course padung sa downtown lakip manukad sa Azuela, Lasang, Panabo, Carmen ug lahos na sa Tagum City. Sirado usab sa mga motorista ang northbound lane gikan sa Azuela padung sa Lasang alas 3:00am hangtud sa alas 12:30 sa udto.
Gidugang ni Abude nga sirad-an usab nila alas 3:00am hangtud 3:30pm alang sa run course ang northbound side nga magsubay sa Lanang, J.P. Laurel, F. Torres ug Azuela sa R. Castillo.
Ang southbound side subay sa downtown lane magpabiling two-way traffic sa mga motorista.
RadyoMaN Erin Lumosbog
