Davao City – Nagpasalamat ang usa ka survivor sa Roxas Night Market bombing niadtong September 2, 2016 o lima (5) ka tuig na ang nakalabay karong adlawa, ang pagkab-ot nga hustisya sa trahedya nga mikalas og kinse (15) ka mga kinabuhi.
Sa interbyu sa DXDC RMN Davao kang Mrs. Melvin Artigas, 62-anyos, taga Barangay 22, Piapi Boulevard, Davao City ug usa sa 70 ka tawo nga na-injured sa trahedya, gikalipay niini ang pagkakonbikto sa pito (7) ka mga akusado nga napasakahan og patong-patong nga kaso human nahukmang guilty sa kasong multiple murder ug multiple attempted murder niadtong September 28, 2020.
Matud ni Artigas, dili man mawala sa iyang huna-huna ang insidente ilabi na nga pipila usab sa iyang kaubanan nga masahista ang namatay, apan wala na kini gibating trauma human nahitabo ang bombing pila na ka tuig ang nakalabay.
“Ang mensahe lang nako sa ilaha (pamilya sa mga biktima) nga mag-strong lang kay unsaon nahitabo na man ‘to. Salig lang ‘ta sa Ginoo kay nahitabo na man gyud. Atoa nalang handumon pero dili nalang nato ibutang sa hunahuna ba nga ingon adto nga kasakit,” sulti niini.
Dugang ni Artigas, wala usab nagkulang ang gobyerno ilabi na sa suportang medikal ug pinansyal human sa insidente.
Gibutyag sa survivor nga aktibo kining nagapartisipar sa misa matag sumad sa bombing apan sa milabay ug karon nga tuig wala na gitugot ang aktibidad o ang pagbaton og gathering tungod sa pandemya.
RadyoMaN Kirby Manzon
