Davao City – Aso ug kahumot nga gikan sa mga pagkaon sama sa barbe-q ug uban pa nahimong aso nga mitabon sa mangilngig nga panghitabo ug baho sa dugo sa mga biktima nga nikuyanap sa dalan samtang ang mga katawa nga madungog gikan sa katawhang igo lang nangukay, nangaon ug nanglaag kauban ang pamilya ug mga higala, napulihan og danguyngoy, pagbakho ug tumang kahadlok gumikan sa pagbulabog sa mga terorista sa hapsay ug malipayon nga kinabuhi sa mga Dabawenyo sa usa sa mga popular nga laaganan dinhi sa syudad sa Davao: Ang Roxas Night Market.
Sa paglingkod sa pamuno-nasud ug gitawag nga amahan sa nasud-Pilipinas nga si Pres. Rodrigo Duterte kaniadtong tuig 2016, gawas sa mga pagsulay gikan sa mga batikos sa iyang mga kritiko ug uban pang hagit, gisulayan usab ang yutang gisaad ug iyang gisilbihan sa pipila ka tuig nga mao ang syudad sa Davao human nga gibombahan ang Roxas Night Market kaniadtong Sept. 2, 2016.
Kaniadtong Agosto 31, gihandum nato ang unang tuig sa mapait nga kasinatian ilabi na ang mga nabiling kabanay sa mga namatay nga emosyonal nga naghinumdom sa ilang mga minahal sa kinabuhi diin kahinumdoman nga ang maong panghitabo mikalas og kinse ka mga inosenteng kinabuhi diin kapin 60 usab ang samaran.
Usa na dinhi ang nabiling padre de pamilya nga Dennis Larida, nga hangtod karon gimingaw siya sa iyang mag-ina ilabi na nga pasko ug bag-ong tuig ug di na niya makauban ang iyang asawa ug anak nga namatay sa dihang nahitabo ang pagpamomba.
Subay sa Roxas Night Market bombing commemoration, gihimo ang usa ka Commemorative Mass sa blast site kauban ang mga kabanay sa mga biktima nga gitambungan usab sa inahan sa dakbayan nga si Mayor Inday Sara Duterte-Carpio diin sa iyang gihatag nga pahayag, nangayo kini og tumang pasaylo sa mapait nga ekperyensya sa mga Dabawenyo tungod sa maong panghitabo.
Padayong gi-awhag sa batan-ong alkalde ang mga Dabawenyo nga padayong mahimong maigmaton ug kung naay inpormasyon nga mahibal-an kalabot sa pagpanghasi sa dakbayan, makigkoordinar gilayon ngadto sa mga otoridad aron mapugngan ang bisan unsang matang sa kasamok ug kaguliyang.
Sa pagkakaron, aduna nay mga Maute group members ang nadakpan apan padayon gihapong ginaimbestigahan sa mga otoridad ang mga kaso niini aron mahatagan og hustisya ang mga biktima bisan pa man kun dili ug dili na gayud mabalik pa ang kinabuhi sa mga namatay apan buot sa ilang mga kabanay nga manubag ang mga nihimo sa maong salaud kun krimen.
Usa ka tuig ang nilabay human sa mangilngig nga insidente, mga kabanay nga nabilin sa mga biktima sa maong pagpamomba ingon man kadtong mga samaran ang naghandum sa mapait nila nga kasinatian diin atubangon na usab nila ang bag-ong tuig nga dili nila makauban ang ilang mga minahal sa kinabuhi.
Sa ilang padayong pagtambal sa mga samad sa ilang kasing-kasing, sa ing-ani nga mga panghitabo, ang mga Dabawenyo dili gayud mutalikod diin ang kanunayng ampo nga bisan pa man nasamutan karong tuiga ang samad ug daw nasamaran ang pako sa agila, malaumon kitang tanan nga sa pag-abot sa bag-ong tuig 2018, ang mga luha ug napaksi nga pako sa gihigugma natong agila maayo na kini, gani mubarog ug makalupad na kini pagbalik sa mas hataas nga dapit ug padayong giyahan sa Kahitas-an ang lupad niini aron makab-ot ug mabatunan ang kalipay nga angay sa iyang mga ginsakpan.
Lupad Agila, Barug Davao!
RadyoMaN Renz Barbarona
