Davao City – Suportado ni Davao Third District City Councilor Joselle Villafuerte ang desisyon ni Mayor Sara Duterte-Carpio nga ablihan pag-usab ang nabantog nang suroyanan sa mga taga-Davao panahon sa kagabhion nga mao ang Roxas Night Market.
Gipaluyohan ni Villafuerte ang subling pagbukas sa Roxas Night Market sugod karong adlawa sanglit mao ra kini ang bugtong pamaagi aron makabalik na sa panginabuhian ang mga vendors ug makasuroy na pod pag-usab ang mga residente nga maoy dalan paingon sa pagbanhaw pag-usab sa normal nga kahimtang nga giguba sa pandemic sulod na sa pila ka bulan karong tuiga.
Daku ang pagtoo ni Villafuerte nga kon mo-improbar lamang ang dagan sa Roxas Night Market ug makita nga disiplinado sa pagsunod sa health protocols ang mga residente maingon man ang mga bisita, hayan mapadayon na ang pag-abli niini.
Apan kon mamatikdan nga gi-balenada lamang ang mga palisiya sa quarantine hinungdan ang pagsaka unya sa mga kaso, nan ang Mayor dali ra usab nga mo-mandar sa pagpasirado pag-usab sa maong dapit posiblemente sa hingpit.
Busa hangyo sa SP Committee on Health chairperson sa mga lungsuranon nga tumanon gayod ang i-imposar nga health protocols ug security measures sama sa dili pagdala dala og gidiling mga butang, pagdala og mga bata ug mga edaran aron ang Roxas Night Market hingpit na gayod maablihan uban sa paglaum nga mabalik na ang mga aktibidad ug normal nga lakat sa ekonomiya sa syudad.
“Ako, I will support the plan of opening of the Roxas Night Market kasi…we have to get used na this is our ‘new normal,’ na kung puwede, mabalik (na) ang tanang mga activity sa atong syudad as much as possible para maglambo na pod ang atong ekonomiya…At the same time, we still have to observe proper health protocol,” panapos ni Villafuerte.
RadyoMan Joel Viray
