Davao City – Gibansay labot sa bomb awareness ug culture of security ang mga vendors sa Roxas Night Market sa Davao City Recreation Center kanhing Almendras Gym nahitabo adlaw’ng Martes, Setyembre 24, 2019.
Sumala ni Col. Consolito Yecla, hepe sa Task Force Davao, mokabat sa 1,000 ka mga food and non-food vendors lakip mga sikad drivers ug dunay mga tindahan sa gilid sa maong dalan ang mitambong niini.
Sabay sa proper hygiene and food safety orientation sa mga bag-ong awardees (tawag sa mga mabunutang vendor sa usa ka quarter) ang pagpaila-ila sa culture of security aron sila na mismo ang magbantay sa mga mosulod ug gawas sa iladong land mark sa syudad gani malikay sa nahitabong pagpamomba niadtong 2016.
Dugang ni Yecla nga kinahangkang masayod na kung unsay angayang mga buhaton sa mga operators sa Night Market panahon nga dunay mamatikdang butang o tao nga posibleng nga maghatag og hulga ngadto sa publiko.
Segun ni Yecla nga kini ang unang higayon nga gihimo.
Nasayran nga kini subay sa planong pagpatuman og Maximum Security Zone sa Roxas Night Market nga una nang gipatuman sa San Pedro Square ning dakbayan alang usab sa seguridad sa katawhan.
RadyoMaN Jason Amisola
