Roxas, ZDN- Si Jun Yebes nagkanayon nga adunay dako nga potensyal ang Roxas nga mamahimong usa ka industrialized Municipality o City kon tarong lamang ang magdumala.
Kon doyugan sa iyang kawsa alang sa pag bag-o sa lungsod sa Roxas, paningkamutan unya niya nga mas molabaw pa sa dakbayan sa Iligan ang Roxas kay mas makapabor man ang mga dagkong kompaniya kay wala may hulga sa kahapsay ug kalinaw.
Mitumaw lamang ang kasamok ug pagpanghadlok sa ilang lungsod niadtong nakalabay nga mga piniliay gumikan sa pagpanghasi sa pipila ka mga armadong tawo diin gituhuan nga gigamit sa mga politico sa LP aron mapugos ang katawhan sa pagsuporta kanila.
Angay kahinumduman nga niadtong nakalabay nga eleksyon, si Jun Yebes ang gipusil didto gawas sa iyang nataran sa iyang balay sa barangay Irasan, sa nasangpit nga lungsod.
Lain nga palambuon unya ni Yebes sa lungsod sa Roxas mao ang Agricultura ug pangisda kay dili ikalimod nga mayoriya sa katawhan didto nabuhi pinaagi sa panguma. Iya usab palambuon ang mga potensyal nga mga lugar alang sa turismo aron mahatagan gayod ug dugang kapanginabuhian ang mga Roxasnon.
Gilantaw usab ni Yebes nga kinahanglan nga proteksyunan ang kina-iyahan kay sa pagkakaron wala kini taga-i ug pagtagad sa mga namunuan.
Gani niadtong mga nakalabayng panahon, nasibya ug namantala man ang gihimong pag rally sa mga katawhan sa barangay Galukso gumikan sa walay pu-as nga pagkoykoy sa balas ug graba diin nadaot niini ang suba ug nahiaguman na sa mga residente ang dakong baha kon adunay pag-ulan sa nasangpit nga dapit.
Mingbutyag usab ang umalabot nga Mayor sa lungsod sa Roxas nga sa pagkakaron, adunay duha ka mga personalidad nga iyang gipilian isip running mate ug 15 ka mga lideres nga iyang pili-an pagka konsehal sa ilang grupo.
Ang batan-on nga Yebes isip Municipal Chairman sa HNP sa Lungsod sa Roxas ang magpapili ubos sa Partido Federal ng Pilipinas diin siya usab ang chairman sa nasangpit nga lungsod.
