BACOLOD CITY – Nagpasar sang resolusyon si Councilor Cesar Distrito nga naga-hingyo naman sa Social Services and Development (DSSD) kag sa Bacolod City Police Office (BCPO) nga hatagan sang solusyon ang problema sa pagdamo sang mga rugby boys kag mga street children sa Bacolod.
Suno kay Distrito nga dapat tutukan sang DSSD kag kapulisan ang mga lugar sa diin madamo sang rugby boys lakip diri ang Bacolod Public Plaza padulong sa Bacolod Reclamation Area, Lacson Street malapit sa Capitol Lagoon kag La Salle Avenue lakip na sa area malapit sa simbahan kag ospital.
Ginahingyo man ni Distrito ang mga management sang mga fast food chain nga sawayon ang mga street children nga yara sa ila establishment ukon indi gani, magpangayo sang police assistance.
Samtang, ginpahayag naman ni Gina Castro sang Task Force Anti-Mendicancy nga nabudlayan sila sa pagdisiplina sa mga salawayon nga mga rugby boys bangod kalabanan sa ila mga menor de edad.
Magluwas nga walo lang sila ka bilog, wala man sila sang salakyan bangod ang DSSD ang isa gid lamang kabilog ang service vehicle.
Apang may ara na alokasyon ang syudad para sa mga nagapangkayo-kayo ukon nagapakilimos.
Umpisa sini nga tuig tubtob sa 2019, may ara sang P8.694M nga budget para sa mga nagapakilimos sa kalye sa diin tagaan sila sang tag P1,800 kada bulan sa sulod sa tatlo ka tuig.
Target sang syudad nga matagaan diri ang una nga 100 ka pamilya sa diin isa sa mga kasugtanan, indi na sila dapat makit-an nga nagapakilimos.
Ang budget para sa ila pagkaon, bulong kag pagpa-eskwela sa ila mga kabataan.
