Davao City – Dakung leksyon kanatong tanan kining nahitabo sa Astorga Davao del Sur:
Una, nagpahinumdom kini sa mga naggunit sa manibela nga mag-amping gayud sa permanente, sa tanang minuto ug segundo nga anaa kita naglawig sa mga kadalanan.
Batasanon nato kanunay kanang gitawag nga defensive driving: Kun naa nay motoristang naka-una, paunha siya – dili man ni lumba ning ato, magkita ra ‘ta didto’s unahan so nganong magginukdonay man gyud?
Ikaduha, kun mag-drive ‘ta, ibilin nato ang init sa ulo ug kasuko diha sa balay ug magbawon ta’g daghang pasensya. Kun screeningan ‘ta sa atong kapwa-driver nga kaskasero, abusador, way modo o way batasan, pasagdi – ang tawag niana, road sharing.
Nasayud ka ba nga daghang mga natala nga disgrasya ug kamatay bunga ra diay sa bangi-trapiko? Naunhan lang ug diyutay, gigukod, nagsinitahay, nisangko sa away, dinunggabay, pinusilay hangtud adunay mamatay – ang tawag niana ‘road rage.’ Pagka way hinungdan nga klase sa pamatasan!
Ug ikatulo, ang mental state kun kapiskay sa panglawas ug panghunahuna sa driver uban sa kapiskay mismo sa sakyanan. Sutaa gyud ang brake kun moganar ba una pa mobyahe unya kun katulgon, pahulay usa – ayaw ipamugos nga mobyahe kun dili makaya.
Ayaw gyud pag-droga-droga una pa molawig haron di ka ma-impyerno.
Kana lang.
RadyoMaN June Duterte
