Hugot nga gikundinar sa mga sakop ug opisyales sa Fraternal Order of Eagles ang pagpusil patay sa usa sa mga miembro sa lungsod sa San Francisco Agusan del Sur kagahapon.
Gipusil sa riding in tandem didto sa Purok – 3 Barangay 3, San Francisco, Agusan del Sur si Ronald Sanchez Villasin, usa ka negosyante, 37 anyos, minyo ug lumolopyo sa maong lugar.
Sigun sa informant nga si Alex Luzon, gipusil ang biktima sa duha ka mga wala mailang suspect nga sakay sa color itom nga single motor nga walay plate number.
Sa inisyal nga imbistigasyon sa San Francisco PNP, nasayran nga pauli na unta ang biktima sa iyang balay sakay sa iyang motor nga Mio nagdala sa plate number MC 9319 nga gikan pa sa iyang tindahan ug furniture nga nahimutang sa Purok 2 Brgy. 1 sa maong lungsod gipusil kini sa mga suspect.
Samad sa nagkadaiyang parte sa lawas ang naangkon sa biktima nga miresulta sa kamatayon.
Sa kasamtangan padayon pa ang gihimong imbestigasyon sa PNP labot na sa maong hitabo.
